aus “acht schtumpfo züri empfernt”, der gesunde menschenversand, 2018:
untänn häzimer eimal ebenä
de underi lette zeigt
di badi
wodeezo ufem schtääg
in fluss use bout isch
ummersintöt ane
unzischmer
wiso oft
echli unagneem xi
welda in züri
händ ja ali gwüsst
wimesich fehaltemus
undiich
hami eigentli
föllig fäl amplaz gfüült
aber hamer forde sonnia
natürli nüt wele la aamerke
und hafesuecht
nüütegliiche ztue
und haso taa
alsobi scho ixmal
im undere lette xi seg
untänn simmer
ufte muur
zwüschede beide flüss
echli ufe gloffe
unzischmer huerenunagnäm xi
welich haja
chli höhenangscht
aber dänn äntli simmer
mitteme chöpfler is wasser
unzonnia isch defo gschwume
und häz foll gnossenim wasser
undiich hami ä fesuecht woolzfüle
bi aber eigentli chli nerfös xi
wi immer i flüss
mizomene schtarche zug
han immernochli
de chopf müsenusem wasser schtrekke
unnach hinderniss
untriibguet
und wasserschtrudel
und haifischflossenusschau halte
untänn hani äscho bald
di gitterschtäb
deet une
am ändi fode badi xee
unggmerkt
dasmer döt wider usschtige müend
unt schtrömig
häpmi rasant det ane treit
unzonnia isch scho deet une xi
untscho ufte leitere
untänn scho ufem schtäg obe
undich bi erscht
unenim wasser
bide gitterschtäb acho
undeigentlich musch dötebe
mitte füess foruus
ad schtäb ane
foralem
wännde fluss so feschziät
wi a dem tag
susch trukzti deet ebefoll
ad gitterschtäb
unkunsch nüme weg
aberich hadas natürli nöggwüsst
unzhäpmi foll gägdi schtäb trukt
undichpi nüme fom fläk chko
undha so halbe panik übercho
umpi döt
hilflos am gitter kläpt
winen chäfer ade autoschiibe
hanaber witerhin fesuecht
irgendwiä suwerän zwürke
haso wele tue
als wär dasales genau so plaant
debi häpmer tschtrömig
mini badhose so halb über sfüdli abezoge
undich hasi fesuecht wider ufez ziä
aber kä schaas
das häzo feschzoge
unti gitterschtäb
hämpmer huere wee ta am bruschpei
untas hätt ez sicher nüm psunders suwerän usxee
undichpi sicher xi
alli idere badi xäntas
und lachezich einenap
scho widereine wos nöpegriift
undich hättja fasch afange brüele
aber dänn isch
zum glük
näbedra einenaacho
unte hätt
i irgendemene oschtschwizerdialäkt
zumir xeit
muschti mitte füess apschtoosse
untänn hanis äntli begriffe
undha pfüess ad gitterschtäb gfüert
ummi mipfoller chraft apgschtoosse
untänn plözli hani chöne
ein fuess umde ander
zude leiterenübere und use
unzonnia häz glaub gar nöggmerkt gha
abersusch warschinli alli andere ide badi
(aus “acht schtumpfo züri empfernt”, Der gesunde Menschenversand, 2018)