züruck zur textliste

aus “giftland”, der gesunde menschenversand, 2023:


…chli schpöter schtaat er ade bar
nimmt en schluk fomene gin tonic
wonem d esther forher id hand trukkt hätt
und luegt zue wisi mit em gianmarco tanzt

di beide hänzich scho bim aacho ade party
wi alti fründe begrüesst

drum ischer ja forher au
näbe dem elände schnuri glandet

de gianmarco
wode esther zum hoisäge
sini fleischige lippe uf d bagge trukkt hätt

sin wurschtige haarige mittelfinger
mit em silbrige totechopffingerring
wode esther grossfätterlich
e haarschträne hinders oor gschtriche hätt

aber d esther schiinten zmöge

gianmarco
kurator us züri
mega schlaue siäch

für si en wichtige mentor
de wichtigscht eigentlich


und das mag ja alles sii
aber eigentli häzich de sämi gwünscht gha
dass d esther und er hüt echli chönd zäme schnurre

oder eigentlich hätter sich das gwünscht
woner sich immer wünscht wänner d esther trifft
nämmli dass si ganz für sich chönd sii

er isch no ganz bide esther
wonen öpper ade bar uf schwiizertütsch aakwatscht
und er sich foorchunt wi am flughafe
wänn mer nach de ferie im ussland
plözlich wider uf schwiizertütsch aakwatscht wird

er füülzich ertappt
und s schwiizer sii holt en grad nomal ii

di hochschtapeläi
er seg öpper us de groosse wiite wält
hätt ide främdi so wunderbar funkzioniert
und uf ein schlag isch si wägg
und er isch wider de sämi us züri
und doch gar nöd fill andersch als anderi

oder zumindescht nözoo winer zwüsche rükbank
und backstage und büüni
merch table und motel 6
und uf de schtraasse fo new york city
gern gmeint hätti

aber da näbim ade bar
schtönd zwei schiggi fraue unden schigge maa

«ich känn di us züri»
seit de maa
«fom xee»

er seg grad paar mönet in ny inere residency
er seg grafiker
und jez grad sini fründin und iri fründin uf bsuech
und hüt ebe da ade swiss party

di beide fraue reded berntütsch
wännd wüsse was de sämi in new york machi

ah geil
uf tour
crazy